Aurreko
urteetan bezala, aurten ere Klipmetrajeen
Festibala izango da gure hezkuntza-tresna nagusia.
Minutu bateko iraupena
duten bideo horiek oso tresna egokiak dira ikasleekin batera gaia lantzeko,
gidoia prestatzeko, eta sormena baliatuz klipmetrajeak egiteko. Horrela, gaiari
buruz daukaten ikuspegia gizarte osoari zabaldu ahal izango diote, bide batez gaitasun digitala ere
landuz.
Oso errealitate
konplexua daukagu inguruan eta gauza guztiek nolabaiteko lotura dute beren
artean. Arazo askoren kasuan (hala nola gosea, pobrezia eta klima-aldaketa),
pentsatu ohi dugu ezer gutxi egin dezakegula, edo pertsona bakar batek egin
dezakeenak ez duela inolako oihartzunik izango. Baina gutako bakoitzak
ekarpentxo bat egin dezake, eta gure esku dago injustiziak desagerrarazteko konpromisoa
hartzea.
Aurtengo leloaren bidez («Zuk zer aztarna uzten duzu?»), gure garapen-ereduak ingurumenean
eta gizartean dituen ondorioen inguruko gogoeta bultzatu nahi dugu.
· Gizartean, gutxi batzuk aberasten ari
baitira, eta beste asko eta asko pobretzen.
· Ingurumenean, nabarmen ari baita hondatzen.
Hain zuzen ere, horregatik
esaten dugu gure garapen-eredua
jasangaitza dela eta desberdintasuna eragiten duela.
Eman zure ikuspuntua eta egizu bat egoera hobetzeko zerbait egin
daitekeela sinesten dutenekin. Denok daukagu zerbait salatzeko edo
defendatzeko, edota mezuren bat zabaltzeko, eta gutako bakoitzaren ikuspegia
berezia, bakarra eta berdingabea da.